YON BON TI KADO POU YON BON TIMOUN
Sara, se timoun yo plis apresye nan
kanton an, pou sajès ak respè li genyen. Tout moun santi yo gen yon dèt pou li, poutèt sèvis li toujou rann yo. Yon jou ki trè espesyal pou Sara, yo deside òganize yon bèl ti fèt pou li, san li pa konnen. Se pa de kontan pitit la kontan sipriz sa. Gen
timoun k ap chante, danse, di pwezi. Se yon moman lajwa nèt ale.
-
Oye, foul la reponn, oye o lala !
-
Bon pawòl pral pale ! Tout zòrèy rete koute ! Manman fè pitit, men li pa fè santiman pitit. Sa fè onz lane depi Sansovè, mari mwen, mouri kote li te kite pitit sa n ap gade la a
nan vant mwen. Depi lè sa, m ap mennen yon lavi ki konplike.
Sepandan, gen yon bagay ki ban m lespwa pou m kontinye viv, se bon mannyè ki lakay pitit fi mwen an. Lajwa li pataje avè
m epi avèk tout lòt moun fè m kwè, non sèlman pou mwen, men tou pou tout bouk la, yon jou sa va pi
bon. »
Fransilya vire fas sou Sara, pitit fi li
, epi li di li : « Mwen te
trakase tèt mwen anpil pou m te wè kisa mwen ka fè pou ou, pou fè kè w kontan pitit mwen. Men ou konnen, afè manman w pa bon. Mwen fè ti resèt sa a pou mwen ofri w kòm kado, se grann mwen ki te montre m li. Mwen kwè w ap renmen l. »
Fransilya lonje kado a bay Sara devan
tout moun. Sara goute l epi li di Fransilya manman li: « Waw ! Manmi, li gou anpil ! kijan li
rele ?
-
Kokiyòl, konsa Fransilya reponn.
- Mèsi anpil manman paske ou fyè de mwen epi ou fè m anpil konfyans. Mwen felisite ou tou ki leve m san papa. Ou ban mwen bon jan ledikasyon, malgre tout sitiyasyon difisil yo.
SaSara pran san li pou l manje ti kokiyòl li. Chak moun ki nan fèt la gen chans manje yon kokiyòl tou. Sara tèlman renmen pataje, li sere kokiyòl pou l pote pou Ana ki se bon zanmi li lekòl la.
Men aswè rive, dòmi mal pou pran Sara, tèlman l ap panse kijan li pral eksplike
ti zanmi li gen lekòl la jan yo te fè yon bèl fèt pou li. Pandan l ap vire kò l sou kabann lan, li tande twit twit twit ! Li kouri leve al gade. Li wè se de ti sourit k ap goumen nan kokiyòl li sere pou pote pou Ana a. Li frape men l sou tab la byen fò, epi li di : « Pati
sourit ! » Menm kote a, li tande vwa manman l ki di : « Sasou, leve non pou ou ka prepare w, ou
konnen se apye w ap pran wout la.»
Sara kouri leve pou li konstate zafè
sourit la se te yon rèv li t ap fè. Konsa li kouri ale gade kote li te sere
Kokiyòl la, erezman li jwenn li jan li te mete
l la. Li tonbe ri epi li eksplike manman l rèv li sot fè a.
Aucun commentaire:
Enregistrer un commentaire