Plis pase yon manman ak yon papa (Ekstrè)

Yon paran pa sèlman yon manman oswa yon papa. Li ka vin zanmi ou. Pitit mwen yo se zanmi mwen, mwen se zanmi yo. Nou konn jwe ansanm, fè blag tankou nou pa t janm konn fache. Lè yo fache, mwen konprann yo paske mwen pa gen rezon tout tan. Zanmitay la toujou la aprè yon pinisyon. Se pa paske paran ou ba w limit ki fè li pa ka zanmi w. Chache konnen li plis. Men kèk lide pou ede w.

1.      Paran ou se konseye ou

Pafwa, li pa itilize bon mo pou konseye w, se plis otorite li ki dikte aksyon w yo. Men aprè tou, li p ap janm mete ou nan move chemen. Ou se san li, pitit li, fòs li, konsolasyon li e feblès li an menm tan. Li vle w reyisi. Li la pou montre w vrè chemen an. Pèsonn pa ka renmen w plis pase li. L ap travay, riske lavi li pou fè edikasyon w. Li fè sa pou w ka vin yon gran pèsonaj demen. Pi gwo vizyonè a se li, se pa ou. Alò, reflechi avan ou dezobeyi li.

2.      Paran ou se pi gwo patwon ou

 Li se premye moun k ap envesti nan ou depi avan nesans ou. Ou pa ka remèt li envestisman li te fè nan ou pou anpil rezon. Yon zanmi, yon menaj, yon konjwen ka ba ou kòb pou relasyon men paran ou fè sa paske se devwa li melanje ak yon renmen san enterè. Ou p ap janm ka kontwole kantite lajan li ba w pou peye transpò ak manje lekòl san konte lòt ti detay pou pase foli. Meyè fason pou rekonpanse li se vin yon sitwayen onèt.

3.      Paran ou se defansè ou

Li defann ou kont tout danje ki ka egziste. Li p ap kite ou pou kont ou si li konnen ou vilnerab. Depi ou te tou piti, li t ap pran swen ou. L ap defann ou kont tout moun ki vle fè ou mal. Nan relasyon santimantal, gen sa tou. Se pa tout moun ki renmen ou ki vle pwoteje ou. Se pa tout k ap vle marye avèk ou. Se pa tout k ap travay pou ou viv ere. Paran ou defann ou kont yo tout kitaske yo pran prizon oswa mouri. Yo prè pou tout bagay.

4.      Paran ou se edikatè ou

Avan ou te ka ale lekòl pou aprann li ak ekri, paran ou te gentan aprann ou anpil bagay ki rete fondamantal pou tout nivo konesans lòm. Li te aprann ou apiye, chita, mache, pale, manje, benyen, abiye, elatriye. Se li menm ki te aprann ou pataje, di bonjou, bonswa, orevwa, mèsi, padon. Li te aprann ou respekte moun ak byen yo. Se li menm ki te aprann ou anpil prensip pou viv ak moun. Prensip sa yo, aprantisaj sa yo sèvi baz pou konstwi pèsonalite w. Ou ka etidye nan gwo inivèsite men se lakay paran ou gwo elèv la leve. Pa kite ran sosyal ou fè w bliye sa.

5.      Paran ou se zepòl pou ou apiye

Lè ou tris, ou santi w pou kont ou, zanmi twonpe ou, w ap soufri nan maladi, zepòl paran ou toujou la pou w apiye avèk tout sekirite. Dlo je ou mouye pi bèl kòsaj li. San ou tache pi bèl wòb li. Malgre ou sal ak labou, ou swe, li pran ou sere nan de bra li. Lè tout zanmi lekòl la, legliz la, nan katye a imilye ou, paran ou aksepte ou. Andikape, malad, blese, nan oksijèn, nan koma, paran ou toujou la. Kilès ki ka renmen ou plis pase li aprè Bondye?

6.      Paran ou se konfidan ou

Ou ka di li tout sa ou vle ak lè ou vle. L ap kontan epi l ap konprann ou. Pa gen mo yon pitit di pou paran l, sitou manman l pa konprann. Dayè, se premye moun ki korije ou e ki konn sa w panse. Gen kat moun sou latè ou ta dwe plis alèz nan egzistans ou : manman w, papa w, mari oswa madanm ou ak pitit ou. Si ou pa santi w ka pale avèk paran ou sou sa w santi se paske relasyon pitit-paran an pa devlope. Petèt se meyè moman pou ou deside fè sa jodi a.

7.      Paran ou se kouraj ou

Mwen sonje lè mwen te konn fè bezwen nan nwit, mwen te konn pè soti. Grann mwen pa t janm ezite soti avèk mwen nenpòt lè a. Lè loraj ap gwonde, gwo van ap soufle, lapli ap tonbe, bal ap tire, paran ou se sèl moun ki p ap kite w pou kont ou. L ap mete w anba bra li pou pare tout danje. Li menm prè pou mouri nan plas ou.

8.      Paran ou se modèl ou

 

Antanke edikatè ou, paran ou se premye pwofesè ou leve jwenn nan lavi ou. Nan pye li ou grandi, li menm ki montre ou fè anpil bagay. Se sou li ou kopye pou pale, aji epi renmen.

Koulye a, mwen kwè w ap konprann pi byen « misyon » paran ou. Ou ka chache definisyon ak sans misyon paran ou tout kote : sou entènèt, nan diksyonè, nan gwo liv men vrè definisyon an se nan relasyon ou avèk li nan respè ak obeyisans malgre tout pwoblèm.  

Se vre gen paran ki maltrete pitit li. Mwen resevwa anpil plent ak kesyon sou sa. Mwen konnen anpil istwa ki mal fini akoz de sa, anpil vi ki brize, plizyè timoun ki kite paran yo pou sove anba move tretman. Konsa tou, mwen konn kèk istwa ki ka kore deklarasyon sa a :

« Si yon timoun fè tout sa paran li mande li fè ki p ap tiye li, ni vyole dwa li, se yon timoun obeyisan epi k ap reyisi »

 

 TAB MATYE

Dedikas e remèsiman ………..………………………….….…4

Entwodiksyon             ………………………...……………….5

Chapit 1. Matirite        …………….……………..….………6-8

Chapit 2. Adolesans    …………………………………......9-13

Chapit 3. Misyon yon paran    ………………….……... ...14-20

Chapit 4. Kalite paran …………………..……............... ..20-23

Chapit 5. Otorite paran           ……..………………..….. 24-25

Chapit 6. Devwa timoun anvè paran  …………...............26-30

Chapit 7. Konprann renmen yon paran           ……………31-34

Chapit 8. Konprann dezakò yon paran (1)      ..………..…35-39

Chapit 9. Konprann dezakò yon paran (2)      ..………..…40-42

Konklizyon     ……………………………………….….. 43-44

Pou achte liv sa a, Whatsapp nan 3934-1225.